Aisha Aly
اشتباه في جلطة لكن في الحقيقة اضطرابات العصب الحائرهو التشخيص
جالو جلطة في القلب و عمل قسطرة و الدكتور خرج من القسطرة قال لنا : مبروك مفيش جلطة .. شرايينه سليمة .
طيب يا دكتور اللي حصل ده كان سببه إيه ؟
الدكتور :- غالباً جلطة و فكت لوحدها.
ده ملخص صغير لجزء من قصة الاستاذ / عمر
الاستاذ /عمر مريض عنده ٤٥ سنة بيشتكي بقالو ٥ سنين من نوبات متكررة عبارة عن نغزة جامدة في الناحية الشمال من الصدر معاها ضيق تنفس و خفقان.
على مدى الـ ٥ سنين عمل عشرات رسم القلب و الإيكو و رسم قلب بالمجهود و مسح ذري على القلب و أشعة مقطعية بالصبغة على الشرايين التاجية و كلها أكدت سلامة القلب .. ده غير إن فحوصات الصدر و الجهاز الهضمي المخ و الأعصاب أكدت عدم وجود علاقة بين النغزة و بين الجهاز الهضمي و الرئة الفقرات العنقية.
و في نهاية المطاف كان الرأي الطبي إن الاستاذ / عمر ما عندوش أي حاجة و إنه يتعايش مع النغزة دي لما تيجي و ياخد مسكن عند اللزوم.
لحد ما في مرة جت النغزة قوية جداً للأستاذ / عمر لدرجة إنه فقد الوعي.
أهله راحو بيه على المستشفى ؛ عمل رسم قلب ظهر فيه تغيرات تشير إلى احتمالية وجود قصور في الشريان التاجي .. سحبوا له تحاليل إنزيمات قلب و تروبونين طلعوا عاليين الاتنين.
طبعا بديهي جداً تكون الخطوة اللي جاية هي قسطرة استكشافية للشرايين التاجية و تركيب دعامات إن لزم الأمر.
دخل الاستاذ / عمر غرفة القسطرة ؛ و بعد ١٠ دقايق الدكتور طلع لأهل المريض و قالهم :- مبروك .. شرايينه سليمة.
قالوا :- طيب الحمد لله يا دكتور .. بس برضو ما عرفناش الأزمة دي جات ليه؟ و هل الأزمة دي لها علاقة بالأزمات السابقة اللي كانت بتجي له و عملنا بسببها عشرات الفحوصات و طلعت سليمة ؟ و هل وارد الأزمة دي تتكرر تاني و للا لا ؟
رد الدكتور :- دي غالبا جلطة و فكت لوحدها أو حصل تقلص شديد في الشريان التاجي و بعدها فتح لوحده .. لكن الموضوع بسيط إن شاء الله.
خرج الاستاذ / عمر من المستشفى و الدكاترة كتبوا له على ( نيڤيلوب ٢,٥ مجم + أسبرين أطفال + نيتروماك )
الاستاذ / عمر كان بياخد العلاج بيدوخ راح مبطله … مفيش أسبوع و جات له النغزة تاني و معاها هبوط و دوخة و ترجيع.
الاستاذ / عمر حلف ماهو نازل من البيت و لا رايح مستشفى و لا واخد علاج.
زوجته اتصلت بالعيادة حجزت له و بعد إلحاح شديد منها و افق ينزل معاها و يجي لي.
حكوا لي قصته بالكامل و الحقيقة سمعتها منهم باهتمام شديد لاني شايفها قصة عجيبة و مثيرة للاستغراب.
فحصته و عملت له رسم قلب و إيكو لاقيت مفيش أي مشكلة.
استوقفني حاجتين مهمين جدا في القصة بتاعته :-
١- الأعراض اللي كانت مصاحبة لاخر أزمة جات له ( دوخة و هبوط و ترجيع ) و زوجته قالت لي كمان إنه كان وشه شاحب جداً كإنه بيحتضر.
٢- الدوخة و الهبوط اللي كانوا بيجوا له بعد ما كان بياخد العلاج بتاعه المحتوي على مادة نيتروجلسرين و اللي بسببه كان بيهبط و يدوخ و وقف العلاج.
ألم في الصدر + دوخة + هبوط + قيء + شحوب + فقدان اتزان بعد أخذ عقار يحتوي على نيتروجلسرين = ؟؟
يكونش هو؟
يكونش اللي في بالي ؟
العصب الحائر!!طيب ألم الصدر و الدوخة و الهبوط و القيء و الشحوب و فقدان الاتزان بعد أخذ عقار يحتوي على نيتروجلسرين هنفسرهم بالعصب الحائر ؛ إنما ارتفاع إنزيمات القلب و التروبونين تفسيرهم إيه و خصوصاً إن ارتفاعهم عادة مرتبط بحدوث جلطات في الشريان التاجي و تلف في خلايا القلب.
بحثت في النقطة دي كتير لحد ما لاقيت إجابات كانت مفاجئة بالنسبة لي.
لاقيت فعلاً إن إنزيمات القلب بتعلى في مرضى اضطرابات العصب الحائر و الجهاز العصبي اللارادي للأسباب الأتية:-
١- التسارع الشديد الذي يحدث في ضربات القلب وقت حدوث النوبة قد يؤدي إلى اختلال التوازن بين احتياجات القلب من التروية و بين قدرة الشرايين التاجية على تحقيق التروية الكافية للقلب مما يؤدي إلى حدوث تلف في بعض الخلايا القلبية و ارتفاع إنزيمات القلب و التروبونين.
٢- ارتفاع مستويات الأدرينالين و النورادرينالين وقت حدوث النوبة يؤدي إلى زيادة كميتهما في القلب بالشكل الذي يسبب أذى و تلف للخلايا القلبية و بالتالي ارتفاع إنزيمات القلب و التروبونين
٣- و ده بقى من أهم الأسباب و هو حدوث ما يسمى بـ اعتلال القلب الانفعالي أو اعتلال مصيدة الأخطبوط أو الاسم الأشهر و هو ( متلازمة القلب المنكسر ) : و في الحالة دي بيدخل القلب كميات ضخمة من الأدرينالين و النورادرينالين و ده بيؤدي الى حدوث ضعف في جزء من عضلة القلب و بالتحديد راس القلب و يحدث بروز في الجزء ده بشكل يشبه مصيدة الأخطبوط في الثقافة اليابانية ( الصورة في أول تعليق ).. الخلل ده بيؤدي إلى تلف بعض الخلايا القلبية و ارتفاع إنزيمات القلب و التربويين
إذن ارتفاع إنزيمات القلب و التروبونين من العلامات اللي قد تكون مصاحبة لمرضى اضطرابات العصب الحائر و اللي ممكن تكون مضللة أحياناًً لان المريض بيتشخص خطاً ً إنه عنده جلطة في الشريان التاجي
طلبت من المريض اختبار المنضدة المائلة ( اللي بنستخدم فيه أقراص تكشف خلل العصب الحائر شبيهة بالنيتروجلسرين اللي كان العيان بياخدها و تسبب له دوخة) طلع إيجابي و حصل له كل الأعراض اللي بيحس بيها ..
كتبت له العلاج المناسب و الحمد لله الأزمة ماجتش و لا مرة من وقتها.
الشاهد …
اضطرابات العصب الحائر و الجهاز العصبي اللاارادي بتيجي أحياناً في صورة أزمة قلبية مصاحبة بارتفاع إنزيمات القلب و التروبونين ؛ ولكن القسطرة القلبية بتؤكد سلامة الشرايين التاجية.
و ده معناه إن ألم الصدر الشائع في مرضى اضطرابات العصب الحائر و الجهاز العصبي اللاإرادي هو ألم قلبي حقيقي مش ألم في الضلوع و لا عضلات القفص الصدري و ده بيعكس لنا حجم المعاناة الرهيبة اللي المرضى دول بيكونوا عايشينها و لا يعلم بحالهم إلا الله.
اللي إيده ساقعة مش قلبه دافي …
اللي إيده ساقعة مش قلبه دافي …
كلنا لنا أصدقاء كل لما نيجي نسلم عليهم نلاقي إيدهم متلجة صيف شتا و كأنهم حاطين كف إيدهم في فريزر ؛ و في منهم كمان إيدهم دايماً عرقانة و مبلولة.
كلنا بعد ما نسلم عليهم نضحك و نقولهم : اللي إيده ساقعة قلبه دافي.
و في الحقيقة الكلام ده مش صح .. و الصح هو اللي إيده ساقعة عصبه حائر.
جالي شاب عمره ٣٥ سنة ؛ أول ما دخل مديت له إيدي عشان أسلم عليه ؛ لاقيت إيده زي قالب التلج رغم إن الجو معتدل جداً و التكييف ما كانش شغال.
قلت له: قبل ما تحكي .. إنت أكيد جاي عشان العصب الحائر
ضحك و قالي: أنا شوفت بوست لحضرتك بيتكلم عن العصب الحائر حسيت إنك بتتكلم عليا فجيت لك بعد ما دوخت عند الدكاترة.
قلت له :- إحكي لي الأعراض
راح مطلع الموبيل من جيبه و قالي : معلش أنا كاتب الأعراض ع الموبيل عشان ما انساش حاجة لانهم كتير أوي و أنا بقيت أنسى بشكل غريب وده من الأعراض اللي بشتكي منها.
ده غير بقى ضيق في التنفس و ألم في الصدر و خفقان و دوخة و هبوط كإني هيغمى عليا و ألم في المعدة و تجشؤ باستمرار و غثيان و قيء و طنين في الأذن و صداع هيفرتك دماغي و شد في الرقبة و الكتف و رعشة في جسمي كإني خايف و ألم في الفك و زغللة في العين و إمساك بيخليني أقعد في الحمام بالساعة و نص و أرق رهيب و لو نمت أصحى كإني ما نمتش و كإني صاحي واكل علقة و جسمي كله مكسر ؛ و تشوش في التفكير و تشتت في الذهن و عصبية شديدة و اكتئاب و احباط و فقدان الشغف في أي حاجة في الدنيا ، لا عايز اشتغل و لا عايز أخرج من البيت و لا حتى طايق اسمع صوت الدوشة بتاعة ولادي الصغيرين و عايز أقفل على نفسي و ما شوفش حد و لا حد يشوفني ؛ و إيدي و رجلي ما بيدفوش لا صيف و لا شتا رغم إني دايما متقل هدومي و لابس جاكت.
بيكمل كلامه : أنا جاي عشان تطمني على قلبي و عايز أعمل اختبار المنضدة المائلة.
عملت له اختبار المنضدة المائلة طلع ايجابي و حصل له أعراض كتير جداً من اللي بيشتكي منها خلال الاختبار.
قلت له إنت عندك خلل في الجهاز العصبي اللاارادي بنوعيه السيبمثاوي و الباراسيمثاوي لان برودة الأطراف و زيادة تعرقها من أعراض نشاط الجهاز العصبي السيمبثاوي و ليس العصب الحائر أو الجهاز العصبي الباراسيمبثاوي.
كتبت له العلاج المناسب اللي بيحفز نشاط السيروتونين و الدوبامين و الاستيل كولين و معاهم مثبطات بيتا
جالي المريض بعد شهر و أغلب شكواه قلت - بفضل الله -و لما سلمت عليه لاقيت إيده ما بقتش ساقعة زي الأول.
الشاهد …
اضطرابات العصب الحائر غالباً بتكون مصاحبة باضطرابات في الجهاز العصبي اللاإرادي كله سواء العصب السيمبثاوي أو الباراسيبمثاوي.
أما بقى المعلومة الأهم فهي : اللي إيده ساقعة مش قلبه دافي .. لا ده عصبه حائر.
التشخيص المبكر لاضطرابات العصب الحائر و الجهاز العصبي اللاارادي ينقذ المريض من مضاعفات جسدية و نفسية في منتهى الخطورة
زمان لما كان مريض بيقولي :- أنا بيجي لي دوخة و هبوط و خفقان و ضيق في التنفس و مشاكل في المعدة و القولون .. و لفيت على كل التخصصات الطبية … هل ممكن ده يكون العصب الحائر؟
كان ردي بيكون :- هل بيحصل لك إغماء ؟
كان بيقولي :- لا
كنت بقوله : يبقى غالبا ً لا لان أهم عرض من أعراض العصب الحائر هو نوبات إغماء متكررة .. و ده اللي بيخلينا نشك بقوة في العصب الحائر و نطلب للمريض اختبار المنضدة المائلة عشان نتأكد من التشخيص.
هي دي كانت نظرتي لموضوع العصب الحائر و إزاي أنا كطبيب قلب أشك فيه و أتأكد من وجوده .. و اعتقد ما زالت هي دي النظرة السائدة عن العصب الحائر بين أغلب أطباء القلب لإن ده اللي إحنا درسناه فعلاً.
لحد ما من حوالي ٥ سنين جت اللحظة الفارقة اللي غيرت نظرتي تماما ً عن موضوع العصب الحائر كله.
جت لي مريضة سنها حوالي ٣٥ سنة بتشتكي من الآتي :-
دوخة - هبوط - ضيق تنفس - خفقان - ألم في الصدر - صداع - شد في عضلات الرقبة و الاكتاف - صعوبة في البلع - حموضة و ارتجاع مريء - انتفاخات شديدة - إمساك مزمن - إلحاح بولي متكرر - شحوب في الوجه - ألم في الفك - إجهاد عام - أرق و نوم متقطع - طنين في الأذن - زغللة في العين - تشتت في الذهن - ضبابية في التفكير - فقدان الشغف في كل نواحي الحياة - عزلة اجتماعية و اكتئاب حاد و محاولات متكررة لإيذاء النفس و أفكار سوداوية في التخلص من الحياة.
المريضة الحقيقة كانت منظمة جدا ً و دقيقة جداً في عرض الشكاوي دي رغم كترها و كانت مسجلة في ورقة معاها التسلسل الزمني للأعراض لدرجة خلتني أركز معاها في كل كلمة بتقولها بدون ملل و لا ضجر.
كنت أنا بالنسبة لها طوق النجاة الأخير بعد رحلة معاناة طويلة مع الأطباء في كل فروع الطب لدرجة إنها طلبت مني أول ما قعدت قدامي إني أسمع كل شكاويها حتى لو مالهاش أي علاقة ببعضها و لا حتى لها علاقة بمجالي في طب القلب.
طبعا ً ما يفوتنيش أقولكم إنها بعد ما يأست من طريق الطب بدأت تاخد طريق الدجل و السحر لحد ما وصلت ( ليڤل الوحش) و راحت لأكبر استشاري أعمال سفلية في مصر الڤيزيتا بتاعته مبلغ خرافي مش هقولكم عليه .. و قالها (( عليكي جن عاشق )) 
سيبتها تتكلم لحد ما خلصت كل كلامها وكنت بسجل قدامي على الكومبيوتر كل شكوى هي قالتها بالحرف و بعد كده سألتها :- بيغمى عليكي ؟
قالت لي :- لا
أعدت عليها السؤال تاني :- بيغمى عليكي ؟
قالت لي :- و الله العظيم لا .. عمري ما أغمى عليا .. و أطباء قلب كتير قبل حضرتك سألوني السؤال ده و قلت لهم لا .. ما أغماش عليا و لا مرة .. و عشان كده كل الأطباء اللي روحت لهم قبل كده و منهم أطباء القلب قالوا لي إني مريضة نفسية و روحت لاكتر من طبيب نفسي و اختلفوا في تشخيص حالتي و منهم اللي قاللي إني مش مريضة نفسية أصلاً.
المريضة كملت كلامها و قالت لي:- أنا كنت بسأل الدكاترة اللي بروح لهم و أقولهم :- مش ده ممكن يكون عصب حائر ؟
و الرد عليها من كل دكتور كان بيبقى متفاوت .. ما بين :
• مافيش حاجة اسمها عصب حائر أصلاً
• عصب حائر إيه فال الله و لا فالك
• مش دي أعراض العصب الحائر طالما مفيش إغماء
• معنديش فكرة عن العصب الحائر
قلت لها : عادة إحنا كأطباء قلب بنبدأ نشك في العصب الحائر و ندي له اهتمام و نطلب الاختبار بتاعه (( اختبار المنضدة المائلة)) لما يبدأ المريض يدخل في نوبات إغماء كامل أو جزئي ؛ لكن مش من المعتاد في الحالة بتاعتك إننا نطلب الاختبار لان حضرتك ما أغماش عليكي و لا مرة.
و لكن لأني شاكك بقوة في العصب الحائر ؛ فأنا هطلب من حضرتك اختبار المنضدة المائلة رغم إن المبرر القوي اللي بنطلب عشانه الاختبار ده وهو الإغماء ؛ مش موجود.
المريضة عملت الاختبار و جات لي ..
عايز أقولكم إن رغم إنها عمرها ما أغمى عليها في حياتها إلا إنها فقدت الوعي في المرحلة الأولى من اختبار المنضدة المائلة بدون احتياج لاستخدام أقراص ( دينيترا ٥ مجم تحت اللسان ) و تأكد وجود اضطرابات في العصب الحائر و عندها نوع من أغلس أنواع الاضطرابات اللي هو النوع المختلط اللي هو بيحصل معاه هبوط شديد في الضغط و تباطوء شديد في النبض.
من يومها و أنا نظرتي لاضطرابات العصب الحائر خصوصاً و اضطرابات الجهاز العصبي اللاارادي عموما ً اختلفت تماماً لدرجة إني بدأت اعتبر المريضة دي نموذج و بدأت أوجه لاي مريض جاي يكشف عندي و شاكك إنه عنده اضطرابات في العصب الحائر ؛ أسئلة عن كل عرض من الأعراض اللي المريضة دي حكيتها لي.
المفارقة الغريبة إن جزء كبير جدا ً من المرضى إن ما كانش معظمهم عندهم كل الاعراض دي أو بعضها بس ما كانوش بيقولولها إلا لما أسألهم عنها اعتقادا منهم إن الشكاوي دي مالهاش علاقة بالشكوى الأساسية اللي هما جايين عشانها.
و من بعدها و أنا نسفت فكرة إني ما أشكش في العصب الحائر و لا أطلب اختبار المنضدة المائلة إلا إذا المريض كان بيغمى عليه.
عشرات الحالات اللي بتعاني بقالها سنين طويلة من جميع أعراض اضطرابات العصب الحائر و الجهاز العصبي اللاإرادي ما عدا الإغماء زي إمساك مزمن أو طنين في الأذن أو ألم في الفك أو دوخة أو ألم في الرقبة …..إلخ ؛ و انفقوا عشرات و يمكن مئات الآلاف من الجنيهات و لم يتوصلوا لأي نتيجة ؛ تبين من خلال فحص بسيط جداً إن كل الاعراض دي كان سببها اضطرابات العصب الحائر و الجهاز العصبي اللاإرادي بس ذنبهم الوحيد إنهم مش بيغمى عليهم عشان الأطباء يبدأوا يشكوا في العصب الحائر !!
من اللحظة دي و أنا نظرتي اختلفت تماما لمريض العصب الحائر من مجرد شخص بيدوخ أو يغمى عليه نتيجة انخفاض الضغط أو تباطؤ ضربات القلب ؛ و إن علاجه هو مجرد تعديل نمط الحياة و التزام العادات الغذائية الصحية وممارسة الرياضة والنوم المبكر و استخدام أقراص أو نقط رفع الضغط زي ( ميدودرين كوراسور) ؛ إلى مريض مسكين محطم جسديًا و نفسيا نتيجة وجود عطل جسيم في أغلب وظائف جسمه المرتبطة بالجهاز العصبي اللاارادي؛ و أن المريض ده عنده خلل كبير فى منظومة النواقل العصبية و إن علاجه الوحيد هو إصلاح هذا الخلل العصبي الكيمائي و ليس استخدام نقط رفع الضغط.
الشاهد ..
يجب نسف فكرة أن الشك في العصب الحائر يكون فقط في المرضى اللي بيعانوا من نوبات إغماء كلي أو جزئي متكررة.
هناك عشرات الأعراض اللي تشكك في وجود اضطرابات في العصب الحائر و الجهاز العصبي اللاإرادي و خصوصاً لو الأطباء المتخصصين في فحص الأعضاء المختلفة محل شكوة المريض أكدوا عدم وجود خلل في العضو نفسه أو خلل طفيف لا يفسر كل شكوة المريض.
التشخيص المبكر لاضطرابات العصب الحائر و الجهاز العصبي اللاارادي ينقذ المريض من مضاعفات جسدية و نفسية في منتهى الخطورة و قد ينقذ أسرة من الانهيار بسبب مرض العائل أو تبديد دخل الأسرة بين الأطباء دون أي جدوى .
اضطرابات الجهاز العصبي اللاإرادي: السبب الرئيسي الخفي في الأعراض القلبية مجهولة السبب.
By : Aisha Aly |
2026-06-02 |
الأبحاث العلمية
البحث بعنوان " اضطرابات الجهاز العصبي اللاإرادي: السبب الرئيسي الخفي في الأعراض القلبية مجهولة السبب "
البحث يناقش ارتباط العديد من الأعراض القلبية مثل ألم الصدر و ضيق التنفس و الخفقان باضطرابات العصب الحائر و الجهاز العصبي اللاإرادي.
هذه الأعراض تحير الأطباء في التخصصات الطبية المختلفة : - القلب - الباطنة - الجهاز الهضمي - الانف و الأذن - المخ و الاعصاب - الصدر - النفسية و العصبية- أمراض المناعة .. و بعد عمل جميع الفحوصات لا يتم التوصل إلى سبب تلك الأعراض.
التوقع المبكر من الطبيب بوجود اضطرابات في العصب الحائر و الجهاز العصبي اللاإرادي يوفر على المريض الكثير من الجهد و الوقت و الحيرة بين تخصصات الطب فضلاً عن توفير الأموال الكثيرة التي يتم إهدارها في فحوصات و أدوية لا جدوى منها.
تم قبول البحث - بفضل الله و حوّله و قوته - للعرض في المؤتمر العالمي الخامس و العشرين لأمراض القلب بالإسكندرية المزمع انعقاده الشهر المقبل - بإذن الله -
البحث يلقي الضوء على أحد الجوانب الطبية بالغة الأهمية التي لم تأخذ حقها من الاهتمام في مصر أو العالم العربي إلى الآن و هي (( اضطرابات العصب الحائر و الجهاز العصبي اللاإرادي)) و يعتبر قبول هذا البحث للعرض في هذا المؤتمر العملاق الذي يضم جهابذة أمراض القلب من كل أرجاء العالم؛ بمثابة بداية لانطلاق العديد من الأبحاث في هذا الصدد بالتعاون مع الجامعات و المراكز البحثية داخل مصر و خارجها.
أعجبني جداً تعليق اللجنة التي قيمت البحث حيث قالت :-
(( موضوع مهم و ذو قيمة في رفع مستوى الوعي العام في هذا الصدد))
الحمد لله الذي هدانا لهذا و ما كنا لنهتدي لولا أن هدانا الله.
تقييم حيوية عضلة القلب بواسطة تقنية التتبع النقطي بالموجات فوق الصوتية القلبية في المرضى الذين تأخروا في تشخيص جلطات القلب الحادة.
By : Aisha Aly |
2026-06-02 |
الأبحاث العلمية
اللهم لك الحمد كما ينبغى لجلال وجهك ولعظيم سلطانك.
إنجاز جديد و عظيم في مجال طب أمراض القلب تم نشره باسمي أمس في مجلة الجمعية الأوروبية لأمراض القلب.
بحث بعنوان :- تقييم حيوية عضلة القلب بواسطة تقنية التتبع النقطي بالموجات فوق الصوتية القلبية في المرضى الذين تأخروا في تشخيص جلطات القلب الحادة.
البحث يناقش استخدام أحد التقنيات الحديثة في مجال الموجات فوق الصوتية القلبية في تقييم أجزاء عضلة القلب التي أصيبت بالضعف نتيجة انسداد الشرايين التاجية المغذية لها في المرضى الذين تأخروا في تشخيص جلطات القلب و لم يتم عمل قسطرة و تركيب دعامة في خلال الـ ٤٨ ساعة الأولى بعد حدوث الجلطة.
هذه التقنية تحدد ما إذا كان الجزء المصاب من عضلة القلب لا يزال به حيوية أم أنه تلف و تليف نتيجة انسداد الشرايين التاجية المغذية له.
و بناءا ً على هذا الفحص يتم تحديد ما إذا كان المريض سوف يستفيد من عمل قسطرة و تركيب دعامة في الشريان التاجي المسدود أم أن هذا الإجراء لن يعود على المريض بأي فائدة نتيجة تليف الجزء المصاب من العضلة بسبب الجلطة.
حاليا ً يتم دراسة حيوية عضلة القلب من خلال عدة طرق مثل الرنين المغناطيسي و المسح الذري و الموجات فوق الصوتية القلبية بالمجهود الدوائي عن طريق استخدام الدوبيتامين منخفض الجرعة و جميعها فحوصات مرتفعة الثمن نسبياً و تحتاج لبعض الاحتياطات و التجهيزات..jpg)
أما الفحص الذي يعتمد عليه فكرة البحث فهو سريع و منخفض الثمن و يمكن عمله بسهولة في غرفة الكشف دون أي استعدادات أو تجهيزات مسبقة.
نسأل الله أن يعلمنا ما ينفعنا و أن ينفعنا و ينفع المرضى بما علمنا.
طفرة العامل الخامس لايدن : حالة إحتشاء عضلة القلب تم تشخيصها خطأ على أنها التهاب عضلة القلب
By : Aisha Aly |
2026-06-02 |
الأبحاث العلمية
شهادة معتمدة من المؤتمر بحصول الدكتور محمد هيكل على المركز الثاني - بفضل الله- في مسابقة أفضل بحث تم إ
لقاؤه شفهياً في المؤتمر.
للعلم …
حصلت على المركز الثاني لاني ألقيت البحث في ٦ دقائق و نصف بدلاً من ٦ دقائق لانه يتم خصم درجات على تجاوز المدة المحددة للبحث و ليس لأن البحث أقل قيمة من البحث الذي حصل على المركز الأول.
متابعين كتير بعتوا يسألوني عن سبب أهمية البحث ده
١- البحث ده بيلقي الضوء على نوع مختلف من أنواع جلطات القلب اللي بتحصل للمرضى صغار و متوسطي السن رغم عدم وجود أي ضيق في جدار الشرايين التاجية ؛ و السبب بيكون حدوث تخثر و تجلط للدم داخل الشرايين التاجية ؛ و النوع ده ما ينفعش معاه تركيب دعامات في القلب و لو ما أتشخصش صح المريض هيجي له جلطات تاني لان المشكلة دي لها أسلوب علاجي مختلف.
٢- البحث ده بيوضح سبب مهم من أسباب حدوث السكتات القلبية في صغار السن و الشباب.
٣- البحث ده بيعيد نظر في طريقة تفكيرنا كأطباء في كتابة موانع الحمل الهورمونية عند السيدات نظرا ُ لوجود ارتباط وثيق بين حدوث جلطات و تعاطي أدوية منع الحمل في حالة وجود استعداد چيني للجلطات عند المريض.
٤- البحث ده بيلفت نظرنا إن حدوث جلطات عند بعض المرضى مش بيكون شيء عارض و بيتاخد له علاج مؤقت و خلاص .. لا.. ده الجلطة بيكون وراها خلل جيني في مكونات الدم بتخلي المريض عرضة للجلطات بشكل متكرر لو لم يتعاطى أدوية السيولة المناسبة مدى الحياة.
الفوز عن طريق بحث بعنوان طفرة العامل الخامس لايدن : حالة إحتشاء عضلة القلب تم تشخيصها خطأ على أنها التهاب عضلة القلب
By : Aisha Aly |
2026-06-02 |
الأبحاث العلمية
بفضل الله حصل الدكتور محمد هيكل على المركز الثاني في مسابقة أفضل بحث معروض شفوياً في مؤتمر القلب بالأسكندرية الأسبوع الماضي.
رغم التحديات الكبيرة و رغم الإمكانيات المحدودة لا يزال هناك أمل.
لو حضرتك من الناس اللي كل شوية يروحوا لدكتور العيون عشان يغيروا النضارة بسبب عدم وضوح الرؤية
لو حضرتك من الناس اللي كل شوية يروحوا لدكتور العيون عشان يغيروا النضارة بسبب عدم وضوح الرؤية و مع ذلك كل النضارات مش مريحاهم و الرؤية مش واضحة وكل مرة الدكتور يأكد لهم إن العين سليمة.
أو روحت كشفت بسبب عدم وضوح الرؤية و دكتور العيون قالك إنت نظرك ٦/٦ و مش محتاج نضارة و عينك سليمة.
لو كنت من الناس دي فأكيد المنشور ده هيفيدك.
إيه السبب اللي يخلي المريض يشتكي من عدم وضوح الرؤية و زغللة العين رغم سلامة العين ؟
الإجابة :-
اضطرابات العصب الحائر و الجهاز العصبي اللاارادي.
إزاي ؟
اضطرابات العصب الحائر و الجهاز العصبي اللاإرادي بتعمل الاتي :-
١- خلل في التروية الد-موية الدماغية بسبب انخفاض الضغط أو خلل التوزيع الارتوائي للد-م و بتالي نقص التروية للعين و الشبكية و ده بيؤدي إلى ضبابية الرؤية.
٢- وجود خلل في تفاعل حدقة العين مع الضوء و لذلك المرضى دول بيكون عندهم ضعف في الرؤية في الإضاءة المنخفضة و ضبابية في الرؤية في الإضاءة المرتفعة.
٣- جفاف العين و دي من الاسباب المهمة في ضبابية الرؤية و اللي عادة بيتم التعامل معاها من خلال قطرات العين فقط أو الدموع الصناعية دون علاج سبب جفاف العين.
الخلاصة …
في حالة وجود عدم وضوح في الرؤية رغم سلامة العين و عدم وجود أي مشاكل طبية في التحاليل و الفحوصات المختلفة و أشاعات المخ يجب البحث في جزئية اضطرابات العصب الحائر و الجهاز العصبي اللاارادي.
هل تعاني من دوخة شديدة أو إغماء فور انتهاء وجبتك؟ الأمر يتجاوز الخمول الطبيعي! اكتشف كيف يسبب فرط نشاط العصب الحائر انخفاض الضغط والسكر ونقص تروية المخ بعد الأكل مباشرة.
كتير مننا ممكن يشعر بعد الاكل مباشرة بحالة من الكسل و الوخم و خصوصاً لو تقلنا في الأكل شوية.
لكن بعض الناس بعد الأكل مباشرة بيدخلوا في حالة من الهبوط الشديد و الدوخة و عدم الإتزان و ممكن الأمر يتطور أحياناً إلى ضبابية مخية و نوم قهري و اضطراب في الوعي و إغماء تام.
التفسير ..
١- انخفاض الضغط :-
أثناء و بعد الأكل مباشرة بيحصل نشاط في العصب الحائر لإنه هو المسئول عن عملية الهضم و الامتصاص ؛ و مع وجود فرط في نشاط العصب الحائر بيبدأ يحصل خلل في انخفاض في الضغط أو تباطوء شديد في النبض أو كلاهما معاً ؛ و ده بيترتب عليه نقص التروية الدماغية و حدوث الأعراض المذكورة.
٢- انخفاض السكر:-
مع بدء هضم الطعام يبدأ العصب الحائر في تحفيز خلايا بيتا في البنكرياس المسئولة عن ضخ الأنسولين في الد-م و تثبيط خلايا ألفا في البنكرياس المسئولة عن ضخ الجلوكاجون في الد-م ؛ و ده بيكون محصلته منع ارتفاع السكر في الد-م ؛ و مع وجود فرط نشاط في العصب الحائر بيحصل ارتفاع شديد في الأنسولين و انخفاض شديد في الجلوكاجون و تكون النتيجة هبوط حاد في مستوى الجلوكوز في الد-م لأرقام بتوصل أحياناً تحت الـ ٥٠ ؛ و بما إن الجلوكوز هو الغذاء الرئيسي للمخ فمع هبوط السكر يحدث الأعراض المذكورة
٣- خلل التوزيع الارتوائي:-
مع بدء عملية الهضم و الامتصاص يقوم الجهاز العصبي اللاارادي بإعادة توزيع الحصة الد-موية لأعضاء الجسم المختلفة و زيادة حصة الجهاز الهضمي من التروية نظرا لاحتياج الجهاز الهضمي لكميات أكبر من التروية اللازمة للهضم و الامتصاص ؛ و مع وجود خلل في العصب الحائر و الجهاز العصبي اللاإرادي تتدفق كميات كبيرة من التروية الد-موية إلى الجهاز الهضمي على حساب التروية المخصصة للمخ فتقل كمية الد-م المتدفق إلى المخ و يبدأ الشخص بالشعور بالأعراض المذكورة.
إذن في المجمل فإن اضطرابات العصب الحائر و الجهاز العصبي اللاإرادي هي المسئولة بشكل كبير عن حالة النوم القهري أو عدم الاتزان أو الإغماء عقب الأكل مباشرة.
و عشان كده من النصايح الهامة جداً اللي لازم أقولها للمرضى دول هي الحفاظ على المعدة دائما في حالة متوسطة بين اللا امتلاء و اللا فراغ لان في الحالتين المريض بيشعر بالهبوط و قرب الإغماء أو الإغماء التام.
لا تنسوا الدعاء لأخي الحبيب الدكتور عمرو بالرحمة والمغفرة.
حكاية مريض تحدى المقاييس الطبية 10 سنوات
ده تقرير قسطرة استكشافية للشرايين التاجية لمريض عمره ٦٦ سنة جالي العيادة النهاردة.
للعلم ..
الشرايين التاجية من أهم شرايين الجسم وظيفتها تغذية أهم عضلة في جسم الإنسان وهي عضلة القلب.
الشرايين التاجية عبارة عن ٣ شرايين رئيسية:-
١- الشريان الأيسر الأمامي النازل.
٢- الشريان المحوري.
٣- الشريان الأيمن.
كل شريان من هذه الشرايين يغذي جزء معين من عضلة القلب ليكون إجمالي التروية الد-موية للقلب ما يقارب ٤٠٠ لتر يومياً.
نرجع تاني لتقرير القسطرة..
التقرير بيقول إن المريض عنده مشاكل كتيرة و خطيرة جداً في جميع شرايينه التاجية:-
١- انسداد كامل في الشريان التاجي الأيسر الأمامي النازل.
٢- انسداد شبه تام في الشريان التاجي المحوري.
٣- ضيق بنسبة ٨٠٪ في منتصف و نهاية الشريان التاجي الأيمن.
يعني بالمقاييس الطبية البشرية المريض ده حالته حرجة جداً و محتاج تدخل عاجل إما عن طريق إجراء جراحة قلب مفتوح عاجلة أو تركيب عدة دعامات في الشرايين التاجية و إلا المريض هيكون عرضة لحدوث جلطات متعددة بالقلب أو فشل عضلة القلب أو الوفاة المفاجئة لا قدر الله.
لكن المشيئة الإلهية لها رأي أخر ..
بص كده على التاريخ اللي تم فيه عمل القسطرة ( ١٧ مارس ٢٠١٦) يعني من أكتر من ١٠ سنين.
المريض من بعد القسطرة لا عمل جراحة قلب مفتوح و لا ركب دعامات و لا حتى مشي على أدوية بنظام ده غير إنه مريض سكر و ضغط و مدخن بشراهة.
و مع ذلك المريض حي يرزق إلى هذه اللحظة بدليل انه جالي العيادة و طبعاً أكيد وضع الشرايين التاجية حالياً أسوء بكتير من الوضع اللي كانت عليه من ١٠ سنوات بسبب التدخين و إهمال العلاج.
أيوة هو العيان جالي تعبان و مش قادر ياخد نفسه بس على الأقل هو ما زال عايش رغم المشاكل الرهيبة اللي في قلبه من أكتر من ١٠ سنين و الأغرب إن عضلة القلب عنده مازالت بحالة جيدة و كفاءة البطين الأيسر حوالي ٥٠٪ ( الطبيعي من ٥٠ إلى ٨٥٪).
كتبت للمريض العلاج المناسب و طلبت منه يعمل قسطرة استكشافية جديدة لإن القسطرة القديمة أصبحت غير معبرة عن الوضع الحالي للشرايين التاجية.
الخلاصة…
رغم التقدم العلمي الرهيب و التطور الجبار في وسائل تشخيص و علاج أمراض القلب و التصنيف الدقيق لدرجات الخطورة في كل مريض ؛ إلا أن القدرة الإلهية أعظم من كل ذلك ؛ ولو الشخص مكتوب له عمر معين ؛ هيعيشه غصب عن المقاييس العلمية و المعايير الطبية اللي بتأكد إن الشخص ده لو ما اتلحقش في خلال ساعات أو أيام أو أسابيع قليلة فهو حتماً هيفارق الحياة.
إديني عمر و اقفل لي كل شراييني التاجية.
الرجاء الدعاء لأخي الحبيب الدكتور / عمرو بالرحمة و المغفرة.
هل الأدوية تكفي؟ 12 نصيحة ذهبية لعلاج العصب الحائر وتعديل نمط الحياة
هل علاج اضطرابات العصب الحائر و الجهاز العصبي اللاإرادي أدوية فقط أم أن هناك خطوط علاج أخرى ؟
في الحقيقة ده سؤال في منتهى الأهمية و يحتاج للكلام بالتفصيل.
علاج العصب الحائر له ركنان أساسيان:-
١- ٥٠٪ تعديل نمط الحياة
٢- ٥٠٪ علاج دوائي.
العلاج الدوائي اتكلمنا عنه كتير قبل كده و لذلك أنا هخصص المنشور ده للكلام عن تعديل نمط الحياة اللازم لعلاج اضطرابات العصب الحائر و الجهاز العصبي اللاإرادي..
إليكم ١٢ نصيحة ذهبية تساعد بشكل كبير في علاج المشكلة بالتوازي مع العلاج الدوائي :-
١- شرب الماء بشكل كافي بمعدل ٣ إلى ٤ لتر يومياً.
٢- تجنب الأماكن الحارة أو قليلة التهوية.
٣- تجنب الوقوف الثابت لفترات طويلة.
٤- النوم في موعد ثابت يومياً لمدة لا تقل عن ٦ ساعات بحيث تكون أغلب ساعات النوم وقت الليل.
٥- تقليل كمية الطعام في الوجبات مع زيادة عدد الوجبات اليومية إلى ٥-٦ وجبات.
٦- منع جميع منتجات الدقيق الأبيض و الاستغناء عنها بدقيق الحبة الكاملة ( إلا في حالة وجود تحسس غذائي من جلوتين القمح ) أو دقيق الشوفان أو دقيق الذرة ؛ و الاعتماد على الرز الأبيض أو البسمتي أو البطاطس و البطاطا ( المسلوقة ) كمصدر غذائي للكربوهيدرات ) و كذلك منع استخدام السكر سواء في الأطعمة أو المشروبات و استخدام سكر الفاكهة أو سكر ستيڤيا بدلا عنه.
٧- منع المقليات تماماً و منع استخدام السمن النباتي و الزيوت المهدرجة و الاعتماد بشكل أساسي على كميات متوسطة من الدهون الطبيعة الحيوانية أو زيت الذرة و زيت الزيتون.
٨- الاهتمام بتركيبة الوجبات الغذائية على مدار اليوم و الحرص على توفر كل العناصر الغذائية الضرورية فيها من المصادر الصحية مثل اللحوم و الدجاج و الأسماك و البيض و الجبن و الألبان و الخضار و الفواكه ( إلا في حالة ثبوت وجود تحسس غذائي من أحد الأطعمة).
٩- ممارسة الرياضة بشكل منتظم و خصوصا تمرينات الأيزوميترك التي تعتمد على الشد العضلي دون حدوث تغير في طول العضلة ( لها أشكال متعددة تقدروا تشوفوها على يوتيوب).
١٠ - توزيع المهام اليومية بشكل منظم لمنع الضغوط النفسية و العصبية خلال اليوم و جعل الأولوية للمهام الأكثر أهمية و تأجيل المهام الأقل أهمية لليوم التالي.
١١ - تجنب استخدام الموبيل لفترات طويلة و التقليل من استخدام وسائل التواصل الإجتماعي و عدم الانشغال المفرط بما يدور فيها.
١٢- القرب من الله و الحرص على أداء الصلوات و العبادات و الثقة في الله و عدم التعلق بالبشر في تحقيق الأهداف و الأخذ بالأسباب و إخراج الصدقات مصداقاً لقوله - صلى الله عليه وسلم- : داووا مرضاكم بالصدقات.
خطورة مدرات البول دون تشخيص: قصة حالة انسكاب تاموري وبلوري في عيادة أ.د. محمد هيكل
جالي مريض في الخمسينات من العمر بيشتكي من ألم في الصدر و ضيق في التنفس و إحساس بالاختناق لما بيجي ينام.
فحصت المريض و عملت له رسم قلب و إيكو لاقيت عنده مشكلة اسمها ( انسكاب تاموري) و دي معناها تجمع سائل حول القلب داخل الغشاء المحيط بالقلب.
كمية السائل كانت كتيرة و طبيعة السائل ده غير معروفه لإن الفحص المبدئي مش موضح سبب الانسكاب ده.
من ضمن الملاحظات اللي شوفتها على المريض أثناء عمل الايكو هي وجود انسكاب بلوري حوالين الرئة اليمنى و غالبا في ارتباط بين السائل اللي حوالين القلب و الرئة اليمنى.
بصيت في أوراق المريض اللي جاي لي بيها لاقيته كاشف قبل ما يجي لي و متشخص إنه فعلاً عنده انسكاب تاموري.
المشكلة إني لاقيته مكتوب له كميات مدرات بول رهيبة على أساس إنها تزود إدرار البول و بالتالي تساعد في تقليل كمية السوائل المحيطة بالقلب.
مدرات البول مسببة للمريض إعياء شديد و هبوط و تشنجات في كل عضلات جسمه و مع ذلك السائل المحيط بالقلب مازال موجود بل بالعكس زاد أكتر كمان.
كل فحوصات المريض اللي لها علاقة باحتباس السوائل في الجسم سليمة ؛ وظائف الكلى و وظائف الكبد و عضلة القلب و حتى الغدة الدرقية كلها ممتازة.
إذن السائل المحيط بالقلب مش ناتج عن احتباس السوائل في الجسم و بالتالي مفيش أي دور لمدرات البول في الحالة دي ؛ بل بالعكس الاستخدام المفرط لمدرات البول هيقلل كمية السوائل في الدورة الد-موية و هيوطي ضغط المريض أكتر و يخلي الوضع يزداد سوء.
طلبت من المريض بشكل عاجل أشعة مقطعية على الصدر.
المريض عملها و حد من أولاده جابها لي و كانت النتيجة إن فيه اشتباه وجود ورم سرطاني في الرئة اليمنى نتيجة التدخين بالإضافة إلى وجود انسكاب تاموري و بلوري غالباً بسبب الورم السرطاني.
يعني المشكلة مالهاش أي علاقة باحتباس السوائل و لا باستخدام مدرات البول و غالبا السائل ده ناتج عن وجود خلايا سرطانية داخل الغشاء التاموري للقلب.
كتبت تحويل للمريض على معهد الأورام و ربنا يشفيه و يقومه بالسلامة.
الشاهد …
مش أي تجمع سائل في الجسم هو عبارة عن احتباس سوائل و بسرعة نكتب مدرات بول بدون أي داعي.
كتابة الأدوية سهل لكن الصعب هو التشخيص الصحيح.
ظنت أنها مجرد أعراض للعصب الحائر! كيف أنقذ "هولتر 48 ساعة" ثمانينية من السدة الكهربية؟
اتبسطت جدا لما عرفت إن في ناس كتير أعمارهم فوق الـ ٧٠ و الـ ٨٠ متابعين منشوراتي على فيس بوك.
منهم سيدة فاضلة على مشارف الـ ٨٠ جات لي العيادة من فترة قريبة و قالت لي إنها بتستفيد جداً من المنشورات و بتقرأ كلامي عن العصب الحائر بشغف و اهتمام لا سيما إنها بقالها شهرين بتشتكي من أعراض مشابهة للأعراض اللي أنا بكتبها عن العصب الحائر :
دوخة - هبوط - صداع - غثيان - ضيق تنفس - خفقان
فحصت المريضة و عملت لها رسم قلب و إيكو ؛ لاقيت كل حاجة كويسة.
قالت لي:- هتطلب لي اختبار المنضدة المائلة يا دكتور ؟
قلت لها:- لا ؛ هطلب من حضرتك فحص تاني اسمه ( هولتر ٤٨ ساعة )
قالت لي :- ليه ؟ مش دي أعراض العصب الحائر و اختبار المنضدة هو اللي بيشخص المشكلة دي ؟
قلت لها :- الأعراض متشابهة مع أعراض العصب الحائر فعلاً لكن لما الأعراض دي تكون عند مريض في العشرينات مثلا غير لما تكون عند مريض في الثمانينات.
بمعنى إن الأعراض قد يكون لها أسباب معينة في المرضى صغار السن و نفس الأعراض قد يكون لها أسباب أخرى تماماً في كبار السن.
سألتني المريضة : طيب و عندي أنا السبب ممكن يكون إيه ؟
قلت لها :- هطلب من حضرتك بعض التحاليل الروتينية و دوبلر على شرايين الرقبة عشان نطمن على الشرايين المسئولة عن التروية الدماغية و رنين مغناطيسي على المخ و فحص مهم جداً اسمه هولتر ٤٨ ساعة.
سألتني:- إيه هو فحص الهولتر ٤٨ ساعة ؟
قلت لها : ده عبارة عن جهاز صغير هنثبته ببلاستر على الصدر من برة و وظيفته إنه يراقب ضربات القلب على مدى يومين للتأكد من عدم وجود خلل كهربي في القلب و أخطرهم بالنسبة للمرحلة السنية بتاعة حضرتك هو السدة الكهربية لانها بتسبب أعراض مشابهة جداً للي حضرتك بتشتكي منها.
بالفعل المريضة عملت كل الفحوصات اللازمة و جات لي الاستشارة و كل فحوصاتها تمام باستثناء فحص الهولتر اللي أكد إن المريضة بتدخل في نوبات متكررة من السدة الكهربية المتقدمة المصاحبة بتباطؤ شديد في الضربات و ده معناه إن المريضة تحتاج بشكل عاجل إلى تركيب منظم كهربي للقلب.
إديت للمريضة تحويل على التأمين الصحي بتاعها و بالفعل راحت و الأطباء هناك مشكورين اتطلعوا على كل الأوراق و الفحوصات و قرروا فعلا تركيب منظم كهربي ثنائي دائم للقلب.
و الحمد لله المريضة جات لي بعدها و كل الأعراض اللي بتشتكي منها اختفت تماماً.
الخلاصة …
مفيش قص و لزق في الطب ؛ نفس الأعراض قد يكون لها اسباب متعددة حسب المرحلة السنية و الأمراض المزمنة المصاحبة لشكوة المريض.